Zaankhua a sawt ta. Zing beltak a vailou kuante a suun nasepna uh tawl kisa in a ihmut uh alim mahmah ta ding. Inn kiim inn kiang a Ak guukdi zong a sihal haam kia lou ngal zaakding a om nawn kei.
Zaan dak 12 bang gingta mahleh, ka nu'n"Bawi, kisa ouh, tui i va tawi ding" a hon chi hi. Tu zaansawt nungnung a tuitawi di chih mawk chia va seel theih ahi kei. "Awle" chi'a thumang tak a zuih a ngai mai hi. Ka hong kisa ua, ken Plastic jerican bawm( nidang a thautui kholna) nih tawi in ka nuun tuithei leh beelpi khat nungpuak in ka hong ki zuuikhe ta uhi. Khua lah vot mahmah tung sawlkha lah taanglou ahihman in mial bekbuk mai a, kawlphemeidet(tourchlight) ka tawi uhi. Ka tuitawi na mun uh naichik hibeek leh a daan om ding hiveen, Minute 25/30 bang la thei phial dia gamla! Amun kahong tungta uh, beel a tui su dim zok a kiiknawn pah di chih lah hitheilou ei sang a ana kuan masa 4/5 bang ana om uh. Maizen a vot naakkal a i ma a ana tung masate ngakngai nawn zeel! Hichi bang a hinkhua zat tawntung ding zaw a peihhuai kei ngei ka chi lungsim hi.
Ka hun uh a hong tungta a ka beelte uh ka hih dim zokzok ua ka ki leh kik ngal uhi. Inntung in tawlnga zual a lupna a lup di chih hilou, vial 1/2 kuan nawn ngai deep! Lawm nangle hichibang hinkhua na tuak kha ngei hia? Pathian hehpih na leh lamkaihna ziak in hichibang hinkhua tu'n ka na zang nawn kei. Zoudawn a na laizom te niteng hinkhua zatdan na ngaihtuah ngeisam hiam? Tu khong a silh leh teen nei zoulou phialphial a khosa te ka ngaihtuah chiang in khasiat tha bang a suak a lah i hih theih a omkei. Mihing aa piang chiatchiat bangziak a a zawng leh a nuamsa deuh leh a hau chia ana ki khen sese a diam maw?
A neideuh tenglah a nuamzaw lam ut chia Lamka phualpi ki delh huan. Lamka na tung a lah, nekguuk taakguk didaan theihbeh lai, a nuamsa ngial in zaw nuamsa mah hang maw. Huai a na zoudawn a mi geenthei te kua toh omkhawm a khosa khawm ding a hi ua le, ei leh ei i ki phungvuh kei leh kuan hong phungvuh ding a hia? Churachandpur(lamka chia khekzoh vuallouh a diam ah) a i khosak hang a i zolei i phawk kei leh Zogam hong paal ngeilou ding. i Paka building leh i sum lomte Zogam sakha i hih lehzaw, zogam deihlou om lou i hih chiah ki hawm lual thei le ut huan na maizeen e maw?
