LAM-ETNA

Ziing ni nou eng singseng mualdawn ah hong suak nawn a, Lianpu thoh hong hunta hi. A zi Nempi bel ana thoubaih in ziing singpi na bawl zoukhin, buh leh mel huan in buai pha mahmah hi.

Lianpu a hongthoh dek chiang in a khe hong tanglou mawk hi. Lamdang sakna toh a kam bang ka heuhou kha zawzen hi. A tanu, Deihnu kiang ah a nu sam diing in sawl a, Nempi leeng hong diangpah hi. A hihding dan thei tuanlou uh ahihman un Daktol sam uhi. Sawtlou nung in Daktolpa hongtung a, Lianpu veel pah tha-that hi. Daktol pa’n a nna a hihzoh in, “Lianpu aw, a poi ngeimai. Na damsung teng a zeng den ding hita chin a…!” chiin hongen hi.

Hiaithu a zaakchiang in Lianpu kiguih hial a, khasia kisa lua in a mittui hong luangkhia zoihzoih mai hi. Ahihhaang in Nempi in, “U Lian, khase mawk ke’n. Kei leh Deihnu om ung a, nang honkeem diing ka hi uh,” chi in hehneem hi. Ahia, Nempi ngei leeng a lungkhamlou ahi tuankei.

Hun leh nite hongthak zeel mahleh Lianpu lungkham ki behlapna hi maimah zeel hi. A zi Nempi bel lungke lou in a pasal keem in ching tou ngiitngeet a, a ittna leeng khang seemseem hi. Lianpu in bang diing a hiaibang natna a tung a tung hiam, chih kia ngaihsun a, theisiam theilou in heh kisa mahmah hi. A khenchiang in, Pathian kou gawpgawp in, ki ngaisia, lamet bei bang a ki koih in amah leh amah bang kithah khawng sawmmawk hi.

Aw Lianpu aw, bangdiing a hiaibang thil deih huailou lawm diing a Pathian in hongpia hiam? Nang a hoihpen leh a nunnem pen hi lai chin a… Nang a diing a ki pahna ziingni suak nawnlou ding hi mai maw! Nang nopsak na ding a sih mah teel zawk ding hi mai lou hia?

Suun nung ni neem lak hun in huihsiang diik ding in Lianpu a inntual uah a ki tholhsuk hi. A hong ki ngaihtuah a, hiaibang natna ka tung a Pathian in hon tungsak ahihleh, A ma’ deihdan mah hidiing ahi. Kingaisia leh lamet bei a ka kingaihsut lai a leeng hon taisan ngeilou, hon ompih a honkeem den! Tua kia leng hi lou lai, a hon iit semsem ka zii leh ka tanu omlai. Toupa zaw thil bangkim geelsiam leh a hoihding kia hihmah ahi, chi in hong kihehneem ta hi.

Hiai a tung a tangthu sung ah bang i muthei a le, Lianpu bang a na nuntaakna zang na hi hiam? I leitung hinkhua ei deihdan bang in i na paipih sawm khanaak uhi. I mailam hun diing i geel a, hiai ka hih dia ka huchi ding chia i geen sa hi na pi, a hun hongtun chiang in ei deihlouh dan ngen a thil hongpai ta, thangpai kisa in lamet bei bang a kikoih, i kiim i kiang phawkpha nawn lou.

I gam i nam mah i chi nawn dia… Kum tamtak paisa a i pi i pu te’n ka gam ka leitang chia sihngam a ana hum uh, tuni tan a ei gam leh lei mah a i teen theih uh kipahhuai hina tel e. Na ngaihtuah ngeilouh uh ka gingkei, tu’n lah mi ang te’n “kei gam, kei lou ahi” bang honchih khum tamai ua! Pil leh siam i kisak kaal ua sum in honguuk neek vek ahi ta ve. I pu i pa’n, ka tu ka ta khang a ding chia lametna toh sisan-naisan kai hial a gam na hum ua, en tua vai dangka deihtaakna ziak lel a man tawm chik a khawng khe hiauhiau mai! Ei a tusawn-khangsawn te’n i pu i pa lunggim sak lel zaw ihi ve ua maw.

Bangchik chiang a a lamet na uh hi zou ding i hi ua? Ka gam ka iit chi in khoveel kilchih ah i kitheh dalhta ua, pil i kisa huntawk veklai ua, lah I Zogam kah aw leh mau ging kitheihmoh bawl i tam mahmah uh. Zomi te bang in hon lawi a hi diing? I gam i innmun loumun a i om chia honsia om ahi hia leh? Theihhak mahmah maw. A hoih deihvek, a gen te’n lah genbei thei ngeilou.

Hoih leh siam kituh in eileh ei i kinawk tuah ua, chi-leh-sa kibang, unau khat lah hi si, kigawmlouh theih diing dan kia ngaihtuah daih. A hi lou lam kia siam. Ki lung liap sak vek. A teek in lamet neinawn lou. A khang te’n lah za mialmial, “ka Zogam, ka Zogam” chia au lala. A ki hasuan tuah diing omlou. Huai in hiai a thei kha diing chi mah bang vek.

Na pu na pa’n nang’ nopsakna diing deih leh lamen tak a gam na hum a nang na tusawn na tasawn te khuallou a na gilpi kia vaakvaak diing na hiam? A’ihk’eh na tup lohching lou a Lianpu bang a lamet bei a om na hi hiam? Na mit mial lah hi lou na kiim na kiang a mi mu lou nahih leh na muh hun lota hi.

Lam-et bei leh kingaisia a ka zogam zaw hi chi mai ding ahi tave chi lou in LAM-ETNA om lai chizaw ni. Ei hun a thilteng bei diing hi lou hi. Ei sih nung a kum bang zah ki vei lai ding ahia chih thei i om kei . Lianpu in a zi leh a tanu a phawk louh daan a nang leng omkha na hi mai ding e. Na kiim na kiang veel thak lechin nang hon huhdiing leh nang hon panpih diing mi tam mahmah hi. Ka Zogam Ka Leitang chia a kem ding leh a zuun ding Khangthak bangzah ta a tam hiam chih ngaisun mah dih.

A lui lak ah a zattheih te keem in, a thak lak ah a hoihhoih teng le’ng hihkhelh om diing in ginhuai lou hi. Tua ahihman in i tuunnu’ kah leh mau ging zaak hun lota hi. Pupa sakmin lohsa i Zogam kum sang zatam pai zong a min manglou diing, himahleh nahkeu bang a a vuai muh chim huai lota aka!

Tua ahihman in kua mah ki lungliap sak lou in, kamkei dungsuun te’n i gial suah in kimaitak sak tuah in, khut kileen kawm in LAM-ETNA omlai a hi chih phawk thak thak in kal suanthak le’ng denchiang i tu i ta te a diing bek a phatuam hongsuak kha diing hi.

ZOMINALISM